呢排比較風平浪靜,無乜大野搞!

來到年尾呢幾個月就熱閙D,皆因有好多人結婚,至少有三個婚禮要幫o下手~

而去到07年1月,終於輪到我地Cell既大佬平結婚喇!恭喜晒呀o下!!

大佬平仲"下令"要小弟幫佢設計張邀請咭!

哈哈.................我好耐無畫野喇.............點算............ 

少年團時代,我都有幫o下手畫o下D海報架!幾OK架都~

有時又畫o下D咭送比人,都畫左好多架~~

不過..........事隔多年.........真係唔知從何入手........有D壓力~嘻~

我搵番個鐵"筆盒"出來(生銹了....),仲連以前本"畫簿"都搵埋出來,嘩!!真係好懷念!!!

而筆盒內的水筆,竟然仲有墨!!!!幾神奇~仲有幾支唔同號碼既鉛筆,正!o岩晒!!

睇o下本畫簿,白畫紙已用晒,夾左一大堆以前既"傑作"!

我既作品都好全面架,有高達,星矢,龍珠,城市獵人,TOUCH,連Jordan都有畫過呀!!

有幾張已用鉛筆起完稿,但之後就無再畫落去喇!因為我覺得起完稿都已經幾靚,騖上色後反而破壞左..............(因我多數只用"木顏色"上色,所以有時效果會不大理想....)..哈哈.....!!

睇番D畫同個筆盒,真係好多回憶都番晒黎,諗起好多以前既野~

希望呢兩樣野可以一直保留落去,因為能夠回憶的,已越來越少了........

咦............邀請咭..............